Zəngəzur dəhlizi sərnişin və yük daşımaları baxımından Qırğızıstan üçün səmərəli marşrut ola bilər.

Bu sözləri “Azərbaycan İqtisadiyyatı” “Telegram” kanalına qırğız ekspert, ABŞ Beynəlxalq İnkişaf Agentliyinin (USAID) Qırğızıstan Respublikasında ticarətin liberallaşdırılması və gömrük islahatları (RTLC) layihəsinin İxrac Tərəfdaşlığı təşəbbüsünün meneceri Ruslan Saralinov deyib.

Ekspert qeyd edib ki, Zəngəzur dəhlizi türk dövlətləri arasında iqtisadi-ticarət əməkdaşlığı üçün böyük imkan kimi görünür və onun regiona ciddi təsir göstərməsi gözlənilir: “Qırğızıstan Zəngəzur dəhlizinə birbaşa bağlı deyil, lakin ölkənin yük və sərnişin daşımaları vasitəsilə dəhlizdə iştirak etməsi mümkündür. Qırğızıstanın dənizə çıxışı olmadığına görə beynəlxalq bazarlara inteqrasiya üçün qonşuları ilə nəqliyyat əlaqələrindən asılıdır".

Ekspert Zəngəzur dəhlizinin Qırğızıstana Türkiyə və Avropaya yüklərin, habelə, insanların daşınması üçün yeni və səmərəli yol təqdim edə biləcəyini vurğulayıb.

Onun sözlərinə görə, Qırğızıstan Zəngəzur dəhlizində iştirak etməzdən əvvəl bir sıra problemlərini həll etməlidir.

“Bu məsələlərə Qırğızıstanda nəqliyyat infrastrukturunun təkmilləşdirilməsi, regionda təhlükəsizlik məsələlərinin həlli və dəhlizdə iştirak edən digər ölkələrlə koordinasiyanın qurulması daxildir.

Bununla belə, Zəngəzur dəhlizində iştirak etməyin Qırğızıstan üçün böyük faydaları ola bilər. Dəhliz ölkənin yeni bazarlara çıxışını təmin edə, ölkə iqtisadiyyatını stimullaşdıra və regional əməkdaşlığı yaxşılaşdırmağa kömək edə bilər”, - ekspert qeyd edib”.

Tamilla MƏMMƏDOVA