Bu ilin yanvar-iyun aylarında ölkədə 122,8 milyon manat dəyərində mebel istehsal edilib.

"vergiler.az"ın Dövlət Statistika Komitəsinin hesabatı əsasında apardığı hesablamalara görə, bu, bir il öncəki müvafiq göstəricini 22 faiz və ya 22,1 milyon manat üstələyir.

Cari ilin may ayı ilə müqayisədə isə iyunda istehsal həcmində dəyər olaraq 2,1 faiz və ya 500 min manat artım qeydə alınıb. İyun ayında 24,2 milyon manat dəyərində mebel istehsal olunub.

Dövlət Gömrük Komitəsinin hesabatına əsasən isə cari ilin ilk altı ayında ölkəyə 65,6 milyon ABŞ dolları dəyərində mebel və onun hissələri idxal olunub ki, bu da 2022-ci ilin eyni dövrünün göstəricisini 15,3 milyon dollar və ya 30,5 faiz üstələyir.

Cari ilin may ayı ilə müqayisədə iyunda sözügedən məhsulların idxalı dəyər ifadəsində 1,12 milyon dollar və ya 10,5 faiz azalıb. İyunda ölkəyə 9,58 milyon dollar dəyərində mebel məhsulları idxal olunub.

Qeyd edək ki, cari ilin ilk 6 ayında bu kateqoriyadan olan məhsulların idxalda xüsusi çəkisi 0,8 faizə bərabər olub.