İndiyədək Milli Hotel Ulduz Təsnifatı almaq üçün 100 hotelin auditi keçirilib və onlardan 44-ü ulduz sertifikatı əldə edib.

Bunu “Azərbaycan iqtisadiyyatı” Teleqram kanalına Azərbaycan Hotel Assosiasiyasının baş icraçı direktoru Günay Sağlam deyib.

Onun sözlərinə görə, digər hotellərə müəyyən çatışmazlıqları aradan qaldırmaq üçün vaxt verilib. Çatışmazlıqlar aradan qaldırıldıqdan sonra həmin hotellərə də ulduzların verilməsi nəzərdə tutulur: “Hotellərə 5, 4, 3 və 3 Superior sertifikatları verilib. Superior kateqoriyası müəyyən edilmiş ulduzdan, məsələn, 3 ulduzdan daha üstün olan, amma 4 ulduzun tələblərini tam qarşılamayan hotellərə verilir. 1 və 2 ulduz da almaq mümkündür, amma, hələ ki, həmin kateqoriyanı əldə edən yoxdur”.

G.Sağlam bildirib ki, Milli Hotel Ulduz Təsnifatı almaq istəyən hotellər üçün 2020-ci ildən könüllü auditlər həyata keçirilir. Hotellərə verilən sertifikatlar 3 illikdir və bu müddət bitdikdə onlar yenidən yoxlamadan keçməlidirlər: “Bu ilin sonunda bəzi hotellər auditdən keçmək üçün yenidən müraciət edəcəklər. Hələ ki, təkrar audit olmayıb”.

G.Sağlam ulduz alan hotellərə gizli müştərilərin göndərilməsi ilə bağlı layihənin hazırlandığını söyləyib. O, bu layihənin tətbiqinə başlama vaxtının hələ müəyyən edilmədiyini açıqlayıb.

İlhamə İSABALAYEVA