Dünyanın 2030-cu ilədək transformasiyası məqsədilə həyata keçirilən BMT-nin dayanıqlı inkişaf strategiyası və dünyanın bu mərhələdə ciddi şəkildə dəyişdirilməsi konsepsiyasına Azərbaycan hökuməti də yaxından qoşulub və bu layihənin uğurla həyata keçirilməsinə öz töhfələrini verməkdədir.

"vergiler.az" xəbər verir ki, bunu “2030-cu ilə doğru: Azərbaycanda sosial-iqtisadi inklüzivlik” mövzusunda keçirilən İkinci DİM Dialoqunun Gündəliyində çıxış edərkən Baş nazirin müavini, Dayanıqlı İnkişaf üzrə Milli Əlaqələndirmə Şurasının sədri Əli Əhmədov deyib.

Onun sözlərinə görə, Azərbaycan hökuməti Dayanıqlı İnkişaf Məqsədləri ilə əlaqədar BMT-nin transformasiya konsepsiyasını həm yüksək qiymətləndirir, həm də bəşəriyyətin bu günü və gələcəyi üçün onun xüsusi əhəmiyyətli olduğunu etiraf edir. "Azərbaycanın konsepsiyaya yanaşması bu motivlərlə əlaqədardır. Bildirmək istəyirəm ki, 2015-ci ildən həyata keçirilən bu konsepsiyada Azərbaycan yaxından iştirak etməklə öz töhfələrini verib. Əgər biz bu töhfələri hesabatların verilməsi şəkilində ifadə etsək, güman edirəm ki, bunun özü də bir nailiyyətdir. Azərbaycan indiyədək üç könüllü milli hesabatını BMT-nin müvafiq qurumuna təqdim edib, dördüncü milli hesabatı isə 2024-cü ildə təqdim etməyi planlaşdırır",- deyə Ə.Əhmədov qeyd edib.