Yaxın günlərdə Kiçik və Orta Biznesin İnkişafı Agentliyi (KOBİA) tərəfindən Azərbaycanda innovativ startaplara "Startap şəhadətnamələri"nin verilməsinə başlanacaq. Bu şəhadətnamələri alan startaplara müvafiq vergi güzəştləri tətbiq olunacaq.

Bakıda keçirilən "Made in Azerbaijan: İnnovasiyalar və Texnologiyalar Forumu"nda çıxış edən KOBİA-nın İdarə Heyətinin sədri Orxan Məmmədov bildirib ki, innovativ biznes və startap ekosisteminin təkmilləşdirilməsi və inkişaf etdirilməsi Agentliyin əsas prioritet hədəflərindən biridir: "Bu məqsədlə innovasiyalar sahəsində sahibkarlığın dəstəklənməsinin təşkilatı modellərin yaradılması və səmərəli fəaliyyətin təmin olunması üzrə tədbirlər nəzərdə tutulub".