Azərbaycan xalçaları və xalça toxuculuğu ənənələrinin Amerika Birləşmiş Ştatlarında tanıdılması məqsədilə Vaşinqtonda xalçaların ilk sərgisi keçirilib. Azərbaycan Ticarət Palatası ofisinin qalereyasında baş tutmuş açılışda həm klassik, həm də müasir üslubda olan hər bir xalçanın arxasında dayanan sənətkarlıq, xüsusi bacarıq, məharət və tarix fonunda Azərbaycanın zəngin mədəni irsi hər kəsə təqdim olunub.

“Azərxalça” ASC-dən “vergiler.az”a verilən məlumata görə, “Azərbaycan xalçaları” adlı sərgidə Qarabağ, Gəncə-Qazax, Quba-Şirvan və Təbriz xalçaçılıq məktəblərinə aid 76 ədəd müxtəlif ölçülü yun və ipək xalçalar nümayiş olunub.

ASC və Vaşinqtonda fəaliyyət göstərən ABŞ-Azərbaycan Ticarət Palatası arasında əldə olunan əməkdaşlıq razılaşmasına əsasən, növbəti il ərzində “Azərxalça” istehsalı əl işi, “Made in Azerbaijan” markalı xalçaların həm Vaşinqton, həm də digər ştatlar ərazisində sərgi və satışının təşkilinə imkan yaradılacaq.