İxracın və İnvestisiyaların Təşviqi Agentliyi – AZPROMO-nun nümayəndələri Rabat və Kasablanka şəhərlərində bir sıra görüşlər keçiriblər.

AZPROMO-dan “vergiler.az”a verilən məlumata görə, Agentliyin təmsilçiləri Mərakeş İxracatçılar Assosiasiyası (ASMEX), Kasablanka-Settat Ticarət, Sənaye və Xidmətlər Palatası (CCISC), Mərakeşin İnvestisiya və İxracın İnkişafı Agentliyi (AMDIE), Mərakeş Müəssisələrinin Ümumi Konfederasiyası (CGEM), Mərakeş Əczaçılıq Sənayesi və İnnovasiya Federasiyası (FMIIP), Karbohidrogenlər və Mədənlərin Milli İdarəsi (ONHYM), "City Concept" konsaltinq şirkəti, həmçinin Türkiyənin BİM şirkətinin Mərakeşdəki filialı və Türkiyənin Rabat şəhərindəki Səfirliyində görüşlərdə iştirak ediblər.

Səfər çərçivəsində Mərakeş bazarının xüsusiyyətlərinin öyrənilməsi, Azərbaycanın qeyri-neft məhsullarının Mərakeşə ixracına dair fikir mübadiləsi aparılıb, Azərbaycanın, xüsusilə işğaldan azad olunmuş ərazilərin investisiya imkanları diqqətə çatdırılıb, qabaqcıl təcrübə və məlumat mübadiləsinin aparılmasına dair razılıqlar əldə olunub.