"Fəaliyyətimizin daha effektli əlaqələndirilməsini təmin etmək üçün ilk dəfə olaraq, İqtisadiyyat Nazirliyi, Mərkəzi Bank və Azərbaycan Banklar Assosiasiyası beynəlxalq ekspertlərin iştirakı ilə birgə fəaliyyət sənədi hazırlayıb".

“vergiler.az” xəbər verir ki, bunu Azərbaycan Banklar Assosiasiyasının prezidenti Zakir Nuriyev “Heydər Əliyev və Azərbaycanın vergi sistemi: yeni çağırışlara doğru” mövzusunda keçirilən konfransda deyib.

Onun sözlərinə görə, hazırda qarşıda duran əsas vəzifə bu sənəddə nəzərdə tutulmuş tədbirlərin davamlı və qarşılıqlı əlaqədə həyata keçirilməsini təmin etməkdir.

Z.Nuriyev qeyd edib ki, ABA tərəfindən İqtisadiyyat Nazirliyinə, o cümlədən Dövlət Vergi Xidmətinə (DVX) Vergi Məcəlləsi, “Bank hesablarının açılması, aparılması və bağlanması qaydası” və digər qanun, qaydalara əlavə və dəyişikliklərlə bağlı 20-dən çox müraciət göndərilib: “ABA tərəfindən qaldırılan bu məsələlərə Dövlət Vergi Xidmətinin rəhbər nümayəndələri hər zaman xüsusi diqqət göstəriblər və bu məsələlər onların birbaşa iştirakı ilə banklarla effektiv müzakirə edilib. DVX hər zaman konstruktiv dialoqa üstünlük verərək bank-maliyyə sektorunun inkişafı, real sektorun maliyyələşdirilməsi, maliyyə inklüzivliyinin dərinləşdirilməsi istiqamətindəki ümumi səylərimizə dəstək olub”.

Z.Nuriyev qeyd edib ki, yeni maliyyə mexanizmlərinin formalaşdırılması, mərkəzi məlumat bazalarının yaradılması, bankların ora çıxışının təmin edilməsi, o cümlədən biznes subyektlərinin rəqəmsal kanallardan istifadəsinin artırılması və bu istiqamətdə məhdudiyyətlərin aradan qaldırılması qarşıdakı müzakirə mövzuları sırasındadır.