Bu gün Bakıda Rusiya şirkətlərinin Azərbaycana təşkil olunan biznes missiyası çərçivəsində Rusiya və Azərbaycan şirkətlərinin onlayn görüşü baş tutub. “vergiler.az” Rusiyanın Azərbaycandakı Ticarət Nümayəndəliyinin yaydığı məlumata istinadən xəbər verir ki, tədbirdə Rusiyanın ağac məmulatları tədarükçüsü olan 11 şirkətinin rəhbərləri, eləcə də Rusiya ağac emalı məhsullarını almaqda maraqlı olan Azərbaycanın tikinti sənayesinin ən iri şirkətlərinin nümayəndələri iştirak ediblər.

İclasda çıxış edən Rusiyanın Azərbaycandakı ticarət nümayəndəsi Ruslan Mirsayapov qeyd edib ki, bu tədbir əməkdaşlığın perspektivlərini müəyyənləşdirəcək və Rusiyadan Azərbaycana məhsulların tədarükü üçün gələcəkdə ixrac müqavilələri bağlamağa imkan yaradacaq.

Görüşdə rusiyalı sahibkarlar öz məhsullarının ixrac imkanlarının təqdimatını keçirib, azərbaycanlı tərəfdaşlarının ehtiyaclarını müzakirə edib və kommersiya təkliflərinin göndərilməsi barədə razılığa gəliblər.