2022-ci ilin yanvar-mart aylarında Azərbaycanın ixrac etdiyi məhsulların 48,8 faizi İtaliyaya göndərilib. Bu barədə məlumat verən millət vəkili Vüqar Bayramov bildirib ki, İtaliyanın da daxil olduğu Avropa İttifaqının (Aİ) Cənubi Qafqaz ilə ticarət dövriyyəsinin üçdə ikisi Azərbaycanın payına düşür.

V.Bayramov qeyd edib ki, tərəflər arasında münasibətlərin daha da dərinləşməsi Aİ ilə Azərbaycan arasında son illər müzakirə edilən və tamamlanmaqda olan Tərəfdaşlıq Sazişinin daha qısa müddətdə imzalanmasına şərait yarada bilər: “500 milyon istehlakçısı olan və alıcılıq qabiliyyətinin yüksək olduğu Aİ ilə əməkdaşlıq Azərbaycan üçün qeyri-neft ixracının artırılması və iqtisadiyyatın şaxələnməsi baxımından da vacibdir. İxrac istiqamətlərinin şaxələnməsi valyuta daxilolmalarında risklərin minimumlaşdırılması aspektindən də aktualdır. Azərbaycanın Avropanın, eləcə də regionun enerji təhlükəsizliyinin formalaşmasında rolu artmaqdadır. 2020-ci ilin dekabrından sonra Azərbaycan Avropaya 11 milyard ku metrdən çox qaz nəql edib. Ötən il 43,9 milyard kubmetr qaz hasilat edən ölkəmizdə istehsalın bu il daha da artacağı gözlənilir”.

Millət bildirib ki, bu ilin ilk rübündə Azərbaycanda 11,8 milyard kubmetr təbii qaz hasil edilib. Qazın 3,5 milyard kubmetri Azəri-Çıraq-Günəşli yatağından, 6,4 milyard kubmetri “Şahdəniz”dən hasil olunub, 1,9 milyard kubmetrini isə SOCAR hasil edib. Həmin dövrdə xaricə qaz satışı 5,9 milyard kubmetr təşkil edib: Türkiyəyə 2,2 milyard, Avropaya 2,6 milyard, Gürcüstana isə 1,1 milyard kubmetr qaz ixrac edilib. Türkiyəyə bu müddətdə TANAP-la 4 milyard kub metrdən çox qaz nəql olunub. Bu o deməkdir ki, ilin birinci rübündə Azərbaycanın qaz hasilatı 12 faiz, qaz ixracatı isə 15,3 faiz çoxalıb. Avropaya qaz ixracatı isə 2,4 dəfə artıb.