9 Dekabr 2021

VERGİLƏR

SOSİAL-İQTİSADİ ONLAYN QƏZET

Vüsal Qasımlı: 2022-ci ildən iqtisadi islahatların yeni mərhələsi başlayır

Prezident İlham Əliyevin rəhbərliyi ilə 2022-ci ildən iqtisadi islahatların yeni mərhələsi başlayacaq. Sosial-iqtisadi inkişafa dair Milli Prioritetlər əsasında hazırlanan “Sosial-iqtisadi inkişaf Strategiyası” 2022-ci ildən başlayaraq növbəti beş ili əhatə edəcək. Eyni zamanda, rəqəmsal transformasiya və Qarabağın inkişafı üzrə sənədlərin də qəbulu gözlənilir. Bir sözlə, Azərbaycan postkonflikt və postpandemiya dövrünün çağırışlarına uyğun yeni səhifəni açır.

Bu barədə İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı bildirib.

O deyib ki, Azərbaycanda Böyük Qayıdış dünya postkonflikt quruculuğu tarixində sürətinə və yeniliklərin tətbiqinə görə, həmçinin daxili imkanlar hesabına maliyyələşdirilməklə özünəməxsus yer tutacaq.

“Milli iqtisadiyyat quruculuğunda əsas məqsəd vətəndaşın rifahı və layiqli həyatıdır. 2019-cu ildə inqilabi sosial paket və pandemiya dövründə sosial müdafiə tədbirlərindən sonra 2022-ci ildən iki milyona yaxın vətəndaşımızın əməkhaqqı, pensiya, müavinət və təqaüdləri artırılacaq. Bunun üçün dövlət büdcəsində kifayət qədər imkanlar var”, - deyə V.Qasımlı qeyd edib.