Tikintiyə icazə proseduru elektronlaşdı

Dövlət Tikinti və Şəhərsalma Komitəsi "ASAN xidmət"lə birlikdə "Ekspertizanın keçirilməsi tələb olunmayan tikinti obyektlərinin tikintisinə və istismarına icazələrin verilməsi" üçün elektron sistem yaradıb. Sistemə müraciət edildikdən 10 gün ərzində istismara icazə almaq mümkün olacaq. Sahəsi kiçik olan birmərtəbəli, aşırımlarının uzunluğu böyük olmayan binaların isə istismara qəbul prosedurundan keçməsi tələb edilmir.

Dövlət Komitəsinin aparat rəhbəri Anar Quliyev bildirib ki, Azərbaycan tikintiyə icazə indikatoru üzrə "Doing Business" sistemində 100 pillə irəliləyib. Qeyd edib ki, təsdiq edilən yeni qayda ilə tikintiyə icazə üzrə tələb edilən sənədlərin sayı 18-dən 7-yə, xərclər isə 6.700 manatdan 1.500 manata düşüb. Həmçinin icazənin alınması üçün vaxt 116 gündən 35 günə endirilib. Tikintiyə icazə prosedurunun sadələşdirilməsində məqsəd sahibkarlarla məmur arasında birbaşa əlaqəni minimuma endirmək, bu sahədə şəffaflığı təmin etməkdir. O da diqqətə çatdırılıb, ekspertiza tələb olunan tikililərin qeydiyyatı ilə bağlı proseslər də tədricən elektronlaşdırılacaq.