Məşğulluğun artırılmasını təşviq edən və ölkəyə valyuta gətirən sahibkarlıq subyektlərinin fəaliyyətinin dayanıqlılığının təmin olunması, habelə investisiya qoyuluşlarını dəstəkləyən vergi siyasəti tədbirlərinin həyata keçirilməsi Dövlət Vergi Xidmətinin yanaşmalarında fundamental baxışları müəyyən edir.

Bu barədə “Vergi Xidməti – 25: Davamlı inkişaf və effektiv transformasiya” Forumu çərçivəsində keçirilən panel müzakirələrdə çıxış edərkən Dövlət Vergi Xidmətinin rəis müavini Samirə Musayeva deyib.

Onun sözlərinə görə, bununla yanaşı, transsərhəd vergitutmadan irəli gələn bir sıra məsələlər vergi qanunvericiliyinin təkmilləşdirilməsini zəruri edir.

“Biz 2024-cü ildən yeni Vergi Məcəlləsinin strukturu üzərində düşünməyə başlamışıq. Bu istiqamətdə sahibkarların, konsaltinq şirkətlərinin, mühüm rola malik böyük holdinqlərin rəy və təkliflərini almışıq. Vergi Məcəlləsinin üzərində işlərə bütövlükdə biznes icmasının ehtiyaclarından irəli gələrək, mövcud iqtisadi münasibətlərin tənzimlənməsi və ədalətli vergi qanunvericiliyinin formalaşması prosesi çərçivəsində başlamışıq. Bundan sonra da həmin istiqamətdə görüləcək işlərdə ictimai iştirak təmin olunacaq”, - Samirə Musayeva qeyd edib.