Bu il sosial təminat növləri üzrə təyinatların elektron qaydada aparılması işləri davam etdirilib. Yanvar-mart aylarında e-qaydada 5 min 600 nəfərə pensiya, 24 min nəfərə isə müavinət-təqaüd təyin edilib.

Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsindən verilən məlumata görə, ümumilikdə ötən il və bu ilin ilk rübündə 65 minə yaxın vətəndaşa həmin sosial təminat növlərinin e-qaydada təyinatı aparılıb.
Bununla da onların hansısa quruma müraciət etməsinə və sənəd təqdim olunmasına ehtiyac qalmadan, onlara e-qaydada pensiya, müavinət və təqaüd təyin olunub.

Ötən il ölkəmizdə pensiya, müavinət və təqaüdlərin, ümumilikdə, 21 sosial təminat növünün avtomatlaşdırılmış təyinat sistemləri işə salınıb. Ötən il bu proaktiv xidmətlər vasitəsilə 15 min nəfərə elektron qaydada pensiya, 20 min nəfərə e-qaydada müavinət-təqaüd təyin edilib.