Hazırda texnologiya şirkətləri tərəfindən istifadəçilərin şəxsi məlumatlarının saxlanması, qorunması və paylanması aktuallıq kəsb edən qlobal məsələlərdən birinə çevrilib. Bu baxımdan, Avropa İttifaqının (Aİ) “Meta”nı 1,3 milyard dollar məbləğdə cərimələməsi böyük maraq doğurur. Aİ-nin məlumatların qorunması qaydalarını pozduğu üçün sosial media şirkətinə qarşı qəbul etdiyi bu qərara əsasən, “Facebook” Avropadakı istifadəçilərindən toplanan məlumatların ABŞ-a ötürülməsini dayandırmalıdır.

Aİ-nin Məlumatların Mühafizəsi Şurası (EDPB) tərəfindən elan edilən bu cəza “Məlumatların qorunmasına dair ümumi qaydalar” adı ilə tanınan sənəd qüvvəyə minəndən sonra beş il ərzində verilmiş ən sərt sanksiyalardan biridir.

“BBC”nin məlumatında bildirilir ki, “Meta” standart müqavilə şərtləri əsasında 16 iyul 2020-ci il tarixindən etibarən “Facebook” istifadəçilərinin şəxsi məlumatlarını ABŞ-a ötürür. İndiyədək EDPB tərəfindən “Meta”ya ABŞ-da yerləşən şirkətə məlumat ötürülməsinin Avropa məxfilik qaydalarını pozduğuna dair xəbərdarlıq edilib və bunu dayandırmaq tələb olunub.

Aİ məlumat təhlükəsizliyi orqanları avropalı istifadəçilərin məlumatlarının ABŞ kəşfiyyat xidmətlərinin əlinə keçə biləcəyindən narahatdır.

Aİ-nin icra orqanı olan Avropa Komissiyası tərəfindən hazırlanan hüquqi tənzimləmələr Avropa vətəndaşlarının şəxsi məlumatlarının ittifaqdan kənara ötürülsə belə, qorunmasını təmin edir.

EDPB-nin prezidenti Andrea Jelinek deyib: “Facebook”un Avropada milyonlarla istifadəçisi var. Buna görə də ötürülən şəxsi məlumatların həcmi çox böyükdür. Rekord həcmdə cərimə, ciddi pozuntuların geniş nəticələrə səbəb olduğu təşkilatlara güclü bir mesajdır".

“Meta”nın icraçı direktoru Nik Kleq, Aİ-nin kəsdiyi cərimənin "ədalətsiz və lazımsız" olduğunu əsas gətirərək qərara etiraz edəcəklərini bildirib.

Minlərlə şirkət və təşkilatın öz funksiyalarını davam etdirə bilməsinin AB ilə ABŞ arasında məlumat ötürülməsindən asılı olduğunu bildirən N.Kleq, gələcək 5 ay ərzində təhlükəsiz məlumat ötürülməsi üçün həll yolu üzərində çalışacaqlarını vurğulayıb.

Mübahisənin ABŞ-nin məlumat əldə etmə qaydaları ilə Avropa məxfilik qanunvericiliyi arasındakı fərqlərdən irəli gəldiyini vurğulayan N.Kleqin fikrincə, “Facebook”un Avropada istifadəsi təhlükə altında deyil.