Çinin Baş Gömrük İdarəsinin hesabatına əsasən, Rusiya ilə Çin arasında ikitərəfli ticarət dövriyyəsi bu ilin ilk dörd ayında 73 milyard dollara çatıb ki, bu da keçən ilin müvafiq dövrü ilə müqayisədə 43 faizdən çox artım deməkdir. 2023-cü ilin yanvar-aprel aylarında Çinin Rusiyaya ixracı illik nisbətdə 67,2 faiz artaraq 33,6 milyard dollara, Rusiyadan idxalı isə təxminən 25 faiz artaraq 39,4 milyard dollara yüksəlib.

Qeyd edək ki, Çin ilə Rusiya arasında ticarətin həcmi 2022-ci ildə rekord həddə çatmışdı. Birinci rübün nəticələri isə ikitərəfli ticarətin bu il 200 milyard dollardan artıq olacağını proqnozlaşdırmağa əsas verir.

Rəsmi statistikaya görə, 2022-ci ildə ticarət artımı baxımından Rusiya Çinin ən yaxşı 20 tərəfdaşı arasında liderdir. Hazırda Çin Rusiyanın ən böyük neft alıcısı kimi Hindistanla rəqabət aparır. Rusiya isə Çindən kənd təsərrüfatı məhsullarının ən böyük idxalçısı kimi Avropa İttifaqından önə keçib.

Rusiyadan Çinə tankerlərlə daşınaraq idxal edilən neftin həcmində də rekord yüksəliş var. Çindəki neft emalı zavodları COVID məhdudiyyətlərinin aradan qaldırılmasından sonra daxili yanacağa tələbatın bərpası fonunda vergi güzəştlərindən yararlanırlar.