Çində yaşıl enerjinin inkişafını təşviq edərək artırmaq səyləri davam etdirilir. Bunun nəticəsində yeni enerjili nəqliyyat vasitələri üçün satınalma vergisindən azad edilən məbləğ keçən ilin müvafiq dövrünə nisbətən bu ilin birinci rübündə 36 faiz artıb.

Çin Dövlət Vergi Administrasiyasının məlumatına görə, yanvar-mart dövründə istehlakçılara ümumilikdə 21,24 milyard yuan (təxminən 3,09 milyard dollar) vergi güzəşti edilib.

Xatırladaq ki, Çin 2014-cü ildən bəri yeni enerji daşıyıcıları sənayesinin inkişafını dəstəkləmək üçün satınalma vergisindən azad olma siyasətini həyata keçirir. Ölkə hakimiyyəti keçən ilin oktyabrında güzəştli vergi siyasətini 2023-cü ilin sonuna qədər uzatdığını elan edib.

Çinin yeni enerji daşıyıcıları sektoru son illərdə vergi güzəştləri hesabına sürətlə inkişaf edir. Bu sektora aid statistik göstəricilərə görə, 2023-cü ilin birinci rübündə yeni enerji ilə işləyən nəqliyyat vasitələrinin pərakəndə satışı keçən illə müqayisədə 22,4 faiz artaraq 1,31 milyon ədədə çatıb.