BVF bu il qlobal inflyasiyanın 6,6 faizə enəcəyini proqnozlaşdırıb
Pul siyasətinin sərtləşdirilməsi fonunda dünya üzrə inflyasiya 2023-cü ildə 6,6%-ə, 2024-cü ildə isə 4,3%-ə düşəcək. Bu barədə Beynəlxalq Valyuta Fondunun (BVF) qlobal iqtisadiyyatın inkişaf perspektivlərinə dair hesabatının yanvar ayı üçün yenilənmiş məlumatında bildirilib.
“Qlobal inflyasiyanın 2022-ci ildəki 8,8%-dən 2023-cü ildə 6,6%-ə, 2024-cü ildə isə 4,3%-ə düşəcəyi, pandemiyadan əvvəlki (2017-2019-cu illər) 3,5%-lik həddən isə yuxarı səviyyədə qalacağı gözlənilir”, - sənəddə deyilir.
"Maliyyə-pul siyasətinin sərtləşdirilməsinin bazardakı tələbi və inflyasiyanı aşağı salmağının əlamətləri aydın görünür, lakin bunun 2024-cü ildən əvvəl özünü tam şəkildə göstərməsi ehtimalı azdır, – fondun ekspertlərinin rəyində göstərilib. – Yanacaq və qeyri-yanacaq məhsullarının qiymətlərinin aşağı düşməsi xüsusilə ABŞ, Avrozona və Latın Amerikası ölkələrində inflyasiyanın azalmasına gətirib çıxarıb. Lakin əksər ölkələrdə baza inflyasiyası hələ pik həddə çatmayıb və pandemiyadan əvvəlki səviyyədən xeyli yüksək qalmaqdadır”.
BVF-nin hesabatında qeyd edilib ki, "pul-kredit şərtlərnin sərtləşməsi və iqtisadi artım tempinin aşağı düşməsi maliyyə sektorunda və borclanmada sabitliyə təsir edə bilər". Bununla bağlı fond borcların restrukturizasiya mexanizmlərini gücləndirməyi tövsiyə edib.
