Türkiyə parlamentinin Plan və Büdcə Komissiyasında Mədəniyyət və Turizm Nazirliyinin 2023-cü il büdcəsi müzakirə edilib. İclasda komissiya üzvləri qarşısında təqdimatla çıxış edən mədəniyyət və turizm naziri Mehmet Nuri Ersoy Türkiyənin mədəniyyət və turizm sahəsində gördüyü işləri ümumiləşdirərək, 2022-ci ilin göstəricilərini, eləcə də 2023-cü il üçün layihə və hədəfləri açıqlayıb.

Türk Turizmi Təbliğ və İnkişaf Agentliyinin (TGA) qurulması sayəsində Türkiyənin dünyanın ən güclü tanıtım ölkəsi səviyyəsinə gəldiyini vurğulayan nazir Ersoy deyib: “BMT-nin Düynya Turizm Təşkilatının məlumatına əsasən, Türkiyə 2019-cu ildə turizm sahəsində rekord göstəriciyə nail olaraq dünyada ən çox turistin gəldiyi ölkələr sırasında altıncı yerə yüksəlib. 2022-ci ilin yanvar-sentyabr aylarında isə ölkəmizə gələnlərin ümumi sayı ötən ilin eyni dövrü ilə müqayisədə 87 faiz artaraq 40,25 milyon nəfərə çatıb. Turizmdən ölkə büdcəsinə gələn gəlirlərdə əhəmiyyətli bir sıçrayış olub”.