“Teleqram” “Apple” şirkətinin vergi siyasətinə qarşıdır
Getdikcə populyarlığı artan “Teleqram” uzun müddətdir ki, öz istifadəçilərinə proqram çərçivəsində pul qazana bilmək imkanı yaradan funksiyanı sınaqdan keçirirdi.
“Teleqram”ın baş direktoru Pavel Durov bu funksiyanın “Apple” şirkətinin vergi siyasəti ucbatından stabil versiyaya çevrilməyəcəyini bildirib.
“Teleqram”ın sınaqdan keçirdiyi funksiya ilə istifadəçilər qazandıqların pulun müqabilində “Teleqram”a heç bir komissiya haqqı ödəməyəcəkdilər. Lakin “Apple” şirkətinin tətbiqdaxili alışlar üçün məcburi ödəniş sistemi və əlavə 30 faiz komissiya haqqı tutması bunun qarşısını alıb. “Apple” vergisi” adlanan komissiya haqqı “Teleqram”ın sınaqdan keçirdiyi funksiyanın ləğv edilməsi ilə nəticələnib.
Baş direktor Pavel Durov qeyd edib ki, “Apple” istifadəçilərin pul qazanmasına mane olur və sahibkarların xəyallarını puç edir. O, “Teleqram” kanalında mövzu ilə bağlı aşağıdakı açıqlamanı paylaşıb: “Bu, trilyon dollarlıq inhisarın öz kontentindən pul qazanmağa çalışan milyonlarla istifadəçi hesabına bazardakı hökmranlığından sui-istifadə etməsinin daha bir nümunəsidir. Ümid edirəm ki, “Apple” daha çox xəyalları məhv etmədən, dövlətin tutduğu ƏDV-dən yüksək vergi tətbiq edərək daha çox sahibkarı əzmədən Avropa İttifaqındakı, Hindistandakı və başqa yerlərdəki tənzimləyicilər ona qarşı tədbir görəcəklər”.
