2022-ci ilin ilk beş ayı – yanvar-may ayları ərzində Qazaxıstan büdcəsinə ötən ilin eyni dövrü ilə müqayisədə 1,5 dəfə çox vergi daxil olub və vergi daxilolmaları üzrə plan 106,8 faiz yerinə yetirilib.

Qazaxıstan Respublikası Maliyyə Nazirliyinin Dövlət Gəlirləri Komitəsindən bildirilib ki, yanvar-may ayları ərzində 5 trilyon 894,2 milyard tenqe (1.000 tenqe= 3,8595 manat) plana qarşı 6 trilyon 293,1 milyard tenqe vergi toplanıb ki, bu da plan göstəricisindən 398,9 milyard tenqe çoxdur. Qeyd edilib ki, respublika büdcəsi ötən ilin müvafiq dövrü ilə müqayisədə 100,3 faiz icra edilib: 4 trilyon 273,5 milyard tenqe plana qarşı 4 trilyon 284,3 milyard tenqe (10,8 milyard tenqe artıq). Bu rəqəm keçən ilin eyni dövrü ilə müqayisədə 1 trilyon 686,9 milyard tenge və ya 1,6 dəfə çoxdur.

Yerli büdcə 123,9 faiz, 2021-ci ilin müvafiq dövrü ilə müqayisədə 29,6 faiz çox icra edilib.

Daxilolmalarda ən çox artım korporativ mənfəət vergisində (1,9 dəfə), yerli istehsal malları üzrə ƏDV-də (2,2 dəfə), neft ixracı üzrə gömrük rüsumunda (2 dəfə), üçüncü ölkələrdən idxal üzrə ƏDV-də (37,8 faiz), faydalı qazıntıların hasilatı vergisində (35 faiz), Aİİ ölkələrindən idxal üzrə ƏDV-də (20,5 faiz) qeydə alınıb.