“Moody's”: İnflyasiya riskləri artmağa meyllidir
“Moody's” kredit reytinq agentliyi 2022-ci ildə dünya üzrə inflyasiya göstəricilərinin yüksək, 2023-cü ilin ikinci yarısında isə orta səviyyədə qalacağını proqnozlaşdırıb. Agentliyin açıqlamasında bildirilib ki, Rusiya-Ukrayna müharibəsinin dərinləşməsi fonunfa ərzaq və yanacaq qiymətlərinin artması və tədarük zəncirinin pozulması səbəbindən inflyasiya təzyiqləri gözləniləndən daha sərt olacaq və daha uzun sürəcək. Qeyd edilib ki, əmək xərclərinin artması və inkişaf etmiş ölkələrdə inflyasiya gözləntilərinin yüksəlməsi riskləri artırır. Proqnoza əsasən, daim artan inflyasiyanın ölkələr üçün xüsusilə iqtisadi yavaşlama və faiz dərəcələrinin yüksəldiyi bir dövrdə mənfi kredit təsirləri olacaq.
"Biz qlobal inflyasiyanın 2022-ci ildə yüksək, 2023-cü ilin ikinci yarısında isə orta səviyyədə qalacağını gözləyirik, inflyasiya riskləri artmağa meyllidir", - açıqlamada qeyd edilib. Agentlik, inflyasiyanın daha “sabit” qalacağı təqdirdə ölkələrin uzun müddət ərzində daha yüksək maliyyələşdirmə xərcləri ilə üzləşəcəyini göstərib. Qeyd edilib ki, yüksək inflyasiyanın uzun müddət davam etməsi sosial və siyasi riskləri daha da artıracaq.
