Venesiya birgünlük səfər üçün 10 avroya qədər vergi tətbiq edəcək

Venesiya meri Luici Brunyaro bildirib ki, şəhərə birgünlük səyahətə gələn turistlərdən vergi tutulacaq. Eksperiment iyun ayında başlayacaq, altı aydan sonra şəhər rəhbərliyi yığımın gələcəkdə saxlanılıb-saxlanmayacağına qərar verəcək. Şəhərə gələnlərin hamısı xüsusi vebsayt vasitəsilə səfərlərini əvvəlcədən bron etməli olacaqlar, Veneto bölgəsinin sakinləri, eləcə də qohumlarını ziyarət etməyə gələnlər və bəzi digər kateqoriyalar yeni yığımı ödəməyəcəklər.

Venesiyaya bir neçə günlüyə gələn turistlər isə otel haqqı ilə bərabər turizm vergisini ödədikləri üçün bu yığımı ödəməkdən azad olunacaqlar. Gün ərzində Venesiyadakı turistlərin sayından asılı olaraq birgünlük səfər üçün yığımın məbləği 3 avrodan 10 avroya qədər dəyişəcək. “Bu gün çoxları anlayır ki, yerləri əvvəlcədən bron etmək sistemi daha tarazlaşdırılmış turizm idarəçiliyi üçün düzgün istiqamətdir. Biz bu çətin eksperiment ilə dünyada birinci olacağıq”, - cənab L.Brunyaro bildirib.

Qeyd edək ki, gələn çoxsaylı turist axını fonunda Venesiyaya giriş üçün vergi tətbiqi 2019-cu ildə də müzakirəyə çıxarılmış və hökumətlə razılaşdırılmışdı. Lakin pandemiyanın başlaması bu verginin tətbiqini gecikdirdi. Venesiya rəhbərliyinin məlumatına görə, şəhərə səyahətə gələnlərin axını pandemiyadan əvvəlki göstəricilərlə eyni səviyyəyə qayıdır.