Ukrayna prezidenti Vladimir Zelenski ölkəyə kənardan gətirilən kənd təsərrüfatı məhsullarının bəzi növləri üçün əlavə dəyər vergisinin (ƏDV) dərəcəsinin artırılması ilə bağlı Vergi Məcəlləsinə dəyişikliyi təsdiq edib.

Ali Radanın iyulun 1-də qəbul etdiyi qanun dəyişikliyinə əsasən, ölkə ərazisinə canlı iribuynuzlu heyvanların, donuzların, qoyunların, südün, yulafın, çovdarın, üyüdülmüş və üyüdülməmiş kətan toxumunun, digər yağlı bitki toxumlarının və meyvələrinin, şəkər çuğundurunun gətirilməsi əməliyyatları 20 faiz dərəcəsi ilə əlavə dəyər vergisinə cəlb olunacaq. Taxıl, qarğıdalı, günəbaxan, soya kimi məhsullara tətbiq olunan ƏDV-nin dərəcəsi isə 14 faizlik əvvəlki səviyyəsində saxlanılıb.