ABŞ Prezidenti Donald Tramp Çin mallarına tətbiq edilən əlavə gömrük vergilərinin artırılması ilə bağlı bu il martın 1-nə nəzərdə tutulan qərarın "məhsuldar görüşmələr" nəticəsində təxirə salındığını bildirib. Həmin qərara əsasən, 200 milyard dollar dəyərində Çin mallarını əhatə edən əlavə vergilərin dərəcəsi 10 faizdən 25 faizə qaldırılmalı idi. ABŞ-ın dövlət başçısı jurnalistlərə verdiyi açıqlamada Floridada Çin lideri Şi Cinpinq ilə görüş planlaşdırdığını və həmin görüşdə ümumi razılığa gələ biləcəklərini söyləyib.

Çinin rəsmi mətbuat orqanı olan "Şinhua" xəbər agentliyi texnologiyaların mübadiləsi, zehni mülkiyyət hüquqları və kənd təsərrüfatı sektorları ilə bağlı danışıqlarda ciddi irəliləyişlər əldə edildiyini yazıb. Qeyd edək ki, ABŞ ilk dəfə keçən ilin iyul ayında 34 milyard dollar dəyərində Çin malları üçün vergiləri artırmış, bundan sonra isə 16 milyard dollar dəyərində Çin malları üçün 25 faizlik vergi tətbiq etmişdi. Bundan sonra Çin tərəfi də ABŞ-a qarşı oxşar addımların atılacağı barədə bəyanatlarla çıxış etmişdi. ABŞ və Çin dövlət başçıları davam edən "ticarət müharibəsinin" qarşısının alınması üçün 2018-ci ilin dekabr ayında müzakirələr aparmaq üçün 90 günlük "atəşkəs" elan etmişdilər. Həmin müddət isə martın 1-də başa çatır.