2019-cu ildə Azərbaycana idxal olunan zərgərlik məmulatlarının dəyəri 15,6 mln. ABŞ dolları təşkil edib ki, bu da real bazar həcmindən dəfələrlə aşağı göstəricidir. Bunu "Azərbaycanda zərgərlik bazarının inkişaf perspektivləri: Problemlər və imkanlar" mövzusunda Bakıda keçirilən sahibkarlara görüşdə çıxış edən Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov deyib.

Onun sözlərinə görə, göstəricilərin bu səviyyədə olması idxal rüsumlarının çox olması, qaçaqmalçılıq, məhsul idxalçılarının vergidən yayınma məqsədilə əməliyyatların qeyri-leqal həyata keçirilməsi ilə bağlıdır: "Bu sahədə məhsulların keyfiyyətinə və əyyar göstəricilərinə dövlət nəzarətini həyata keçirəcək qurumunun hazırda fəaliyyət göstərməməsi, bazar iştirakçılarının, eləcə də istehlakçıların hüquqlarının pozulması hallarını artırır".

O, həmçinin əlavə edib ki, bu sektorda fəaliyyət göstərən sahibkarların təşkilatlanması, dövlət-özəl dialoqu vasitəsilə ictimai müzakirələrin aparılmasında boşluqlar mövcuddur: "Bu sahənin inkişaf etdirilməsi, müvafiq sahədə ticarətin və istehsalın təşviqi məqsədi ilə idxal rüsumlarının dərəcələrinə yenidən baxılması və ya tənzimləmə alətlərin sadələşdirilməsini təklif edirik. Belə ki, qiymətli metallar və daşların ölkəyə idxalı üçün 15 faiz gömrük rüsumu, 18 faiz ƏDV, əlavə olaraq aksiz vergisi tətbiq olunur. Bir sıra MDB ölkələrinin təcrübəsinə baxsaq, görərik ki, bu sahədə tətbiq edilən vergi və rüsum dərəcələri bizim ölkə ilə müqayisədə olduqca aşağı və ya yox dərəcədədir. Məsələn, Ukrayna, Gürcüstan, Özbəkistan və s. ölkələrdə bu məhsulların idxalına heç bir rüsum alınmır. Hətta bir sıra ölkədə müvafiq sahədə yerli istehsalın təşviqi məqsədi ilə sahibkarlara güzəştli şərtlərlə kreditlər təklif olunur".