31 Oktyabr 2020

VERGİLƏR

SOSİAL-İQTİSADİ ONLAYN QƏZET

Subsidiyaları yeni qaydalarla almağa imkan verən "Fermer kart"ları artıq sahiblərinə paylanır

Elektron Kənd Təsərrüfatı İnformasiya Sistemi (EKTİS) gübrə, toxum, pestisid təchizatçılarının, eləcə də baytarlıq, fitosanitariya xidmətləri göstərənlərin özlərini fermerlərə tanıtması üçün ən yaxşı platformadır. EKTİS təchizatçılara imkan verir ki, uyğun qiymət, keyfiyyətli və çeşidli məhsul təklif etməklə sistemdə qeydiyyatdan keçmiş fermerləri öz alıcılarına çevirsinlər. Bu platforma həm təchizatçılara, həm də fermerlərə seçilmək və seçim üçün böyük üstünlüklər təqdim edir. Bu sözləri Kənd Təsərrüfatı nazirinin müavini İlhamə Qədimova Bakıda gübrə, pestisid və toxum təchizatçıları ilə görüşdə deyib.

İki yüzədək təchizatçının qatıldığı görüşdə Elektron Kənd Təsərrüfatı İnformasiya Sistemində təchizatçıların qeydiyyat modulunun təqdimatı keçirilib, subsidiyaların verilməsinə hazırlıq prosesinin son mərhələsi ilə bağlı açıqlamalar verilib.

Kənd Təsərrüfatı Nazirliyi yanında Aqrar Kredit və İnkişaf Agentliyinin (AKİA) sədri Mirzə Əliyev çıxış edərək, gübrə və pestisid bazarının tamamilə liberallaşdığını bildirib. Mirzə Əliyev görüşün əsas məqsədinin təchizatçıları EKTİS-də qeydiyyatdan keçməyi sürətləndirməyə səsləmək olduğunu vurğulayıb. Agentlik sədri qeydiyyatdan keçmə prosedurunu əvvəldən sonadək iştirakçılara nümayiş etdirib. Payızlıq əkinlərə gübrə vermək vaxtının başladığını qeyd edən Mirzə Əliyev təchizatçıları qeydiyyatdan keçməyə, satışlarını həyata keçirən mağazaları pos-terminallarla təmin etməyə çağırıb.