20 Oktyabr 2020

VERGİLƏR

SOSİAL-İQTİSADİ ONLAYN QƏZET

"Star" zavodunun illik gəlirləri 6-9 milyard dollar civarında qiymətləndirilir

Neftin qiymətindən asılı olaraq, SOCAR-ın Türkiyədə yerləşən "Star Rafineri" neft emalı zavodunun (NEZ) illik gəlirləri 6-9 mlrd. ABŞ dolları təşkil edəcək. "APA-Economics"in məlumatına görə, bunu Əliağada (İzmir şəhəri) keçirilən mətbuat konfransında NEZ-in baş direktoru Mesut İlter deyib. Onun sözlərinə görə, NEZ-in ümumi mənfəətinin 600-800 mln. dollar, xalis mənfəətinin isə 500 mln. dollar olacağı gözlənilir. M.İlter əlavə edib ki, neft emalı zavodunun tam gücü ilə işlədiyini nəzərə alaraq, artıq gələn ilin nəticələrinə görə, sözügedən göstəriciləri təmin etmək mümkün olacaq.

Qeyd edək ki, "Star Rafineri" neft emalı zavodu ötən ilin oktyabr ayında istifadəyə verilib. Zavod ildə 10 mln. ton xam neft emal etmək gücünə malikdir. Əsas məhsullarını dizel yanacağı (5 mln. tona yaxın), təyyarə yanacağı (1,5 mln. ton), nafta (1,5 mln. ton), reformat (1 mln yaxın) və kükürd, maye neft qazı, neft koksu və sair neft məhsulları təşkil edir. Bu il zavodda 8 mln. ton neftin emalı nəzərdə tutulub. İlin sonunadək müəssisə 4 mln. ton dizel, 1 mln. tona yaxın təyyarə yanacağı, 1 mln. ton nafta, 700 min ton reformat istehsal etməyi planlaşdırır. Lakin 2020-ci ildən etibarən "Star" ildə 10 mln. ton neft emal edəcək.