Azərbaycanın turizm imkanları Ankarada beynəlxalq sərgidə nümayiş etdirilir
Türkiyənin Ankara şəhərində keçirilən 9-cu “TRAVELEXPO ANKARA” Beynəlxalq Turizm və Səyahət Sərgisində Azərbaycanın turizm imkanları təqdim olunur.
Dövlət Turizm Agentliyindən verilən məlumata görə, Türkiyənin müxtəlif regionlarından və 20-dən çox ölkədən turizm sənayesi nümayəndələrini bir araya gətirən sərgi turizm istiqamətlərinin tanıdılması və beynəlxalq işgüzar əlaqələrin qurulmasına xidmət edir.
Türkiyə bazarında Azərbaycanın tanıdılması istiqamətində həyata keçirilən fəaliyyət çərçivəsində Azərbaycan Turizm Bürosunun (ATB) Türkiyədəki rəsmi nümayəndəlik ofisi sərgidə milli stendlə təmsil olunur. Stenddə ölkənin qış turizmi potensialına xüsusi diqqət yetirilir.
Sərgidə iştirakın əsas məqsədi Azərbaycanın turizm potensialını Türkiyə və digər ölkələrin turizm sənayesi nümayəndələrinə tanıtmaq, B2B görüşlər vasitəsilə yeni işgüzar əlaqələr qurmaq və iki ölkə arasında turizm sahəsində əməkdaşlıq imkanlarını genişləndirməkdir.
