Nigeriyanın Kiçik və Orta Müəssisələrin İnkişafı Agentliyinin (SMEDAN) təşkilatçılığı ilə “D-8”ə üzv dövlətlərin KOB üzrə dövlət qurumlarının 9-cu görüşü keçirilib. Onlayn formatda təşkil olunmuş görüşdə ölkəmizi Kiçik və Orta Biznesin İnkişafı Agentliyi (KOBİA) təmsil edib. Azərbaycanla yanaşı, tədbirdə Banqladeş, Misir, Malayziya, Nigeriya, İndoneziya, Pakistan və Türkiyənin KOB sahəsində fəaliyyət göstərən dövlət qurumlarının nümayəndələri iştirak ediblər.

Görüşdə KOBİA nümayəndələri tərəfindən KOB-ların iqtisadi şaxələndirmə, məşğulluq, innovasiya və dayanıqlı inkişafda artan rolu qeyd edilib. Agentlik tərəfindən sahibkarlara göstərilən dəstək və xidmətlər, o cümlədən məsləhət, təlim xidmətləri, startapların təşviqi və bazarlara çıxışına dəstək mexanizmləri, sahibkarlara "G2B" və "B2B" xidmətlərin vahid məkanda təqdim edildiyi KOB evi modeli barədə məlumat verilib. Həmçinin KOBİA-nın COP29 çərçivəsində irəli sürdüyü KOB-ların yaşıl keçidi üzrə Bakı İqlim Koalisiyasına dair Birgə Bəyannamə haqqında məlumat tədbir iştirakçılarının diqqətinə çatdırılıb.

Tədbirdə “D-8” çərçivəsində KOB sahəsində əməkdaşlığın praktik istiqamətlər üzrə inkişaf etdirilməsi məsələləri müzakirə olunub. Həmçinin görüşdə “D-8” ölkələrinin KOB üzrə dövlət qurumları arasında imzalanmış Anlaşma Memorandumunun reallaşdırılması çərçivəsində KOBİA tərəfindən hazırlanmış Fəaliyyət Planının layihəsi təqdim olunub. Sənəddə “D-8” ölkələri arasında KOB siyasəti və proqramları üzrə təcrübə mübadiləsi, biznes imkanları bülleteni, onlayn təlimlər, “B2B” görüşlərin keçirilməsi, inkubatorlar və İKT üzrə mübadilə, eləcə də yaşıl KOB-larla bağlı pilot fəaliyyətlər nəzərdə tutulur.