2026-cı ilin yanvar-mart ayları ərzində İqtisadiyyat Nazirliyi yanında Əmlak Məsələləri Dövlət Xidməti tərəfindən daşınmaz əmlak üzərində 79.921 mülkiyyət hüququ qeydiyyata alınaraq çıxarışla təmin edilib. Qeydiyyata alınan mülkiyyət hüququnun 14.256-sı (17,8 %) ilkin, 65.665-i (82,2 %) isə təkrar qeydiyyatın payına düşür.

Bu dövrdə fərdi yaşayış və bağ evi üzərində – 17.029, mənzil – 19.063, torpaq sahəsi – 40.894, qeyri-yaşayış binası – 753, qeyri-yaşayış sahəsi – 2.029, əmlak kompleksi – 125 və çoxmərtəbəli yaşayış binaları üzərində – 28 mülkiyyət hüququnun dövlət qeydiyyatı aparılıb. Qeydiyyata alınan mülkiyyət hüquqlarının 20.540-ı Bakı şəhərinin, qalan hissəsi isə bölgələrin payına düşür.

Yanvar-mart ayları ərzində 56.272 texniki pasport tərtib edilib, 13.548 ipoteka müqaviləsi qeydiyyata alınıb.

Qeyd edək ki, “Daşınmaz Əmlakın Dövlət Kadastrı və Reyestri” publik hüquqi şəxsi tərəfindən göstərilən ümumi xidmətlər üzrə cari ilin birinci rübü ərzində 800 minə yaxın müraciət olunub, bunun 450 minə yaxını elektron xidmətlər təşkil edib.