Bu ilin yanvar-mart aylarında Naxçıvan Muxtar Respublikasının İqtisadiyyat Nazirliyi yanında Əmlak Məsələləri Dövlət Xidməti tərəfindən muxtar respublikada 30 dövlət əmlakı özəlləşdirilib.

Muxtar respublikanın İqtisadiyyat Nazirliyinin məlumatına görə, özəlləşdirmədən daxilolmalar 129 min manat təşkil edib, bundan 96,7 min manatı muxtar respublika büdcəsinə ödənilib. Cari ilin ilk üç ayı ərzində muxtar respublikada 25 hərrac keçirilib.

Bununla yanaşı, hesabat dövründə 84 yeni icarə müqaviləsi bağlanılıb ki, bunlardan 57-si qeyri-yaşayış, 27-si isə torpaq sahələrinə dair olub. 64 müqavilənin isə müddəti uzadılıb.

Yanvar-mart ayları ərzində qüvvədə olan müqavilələr üzrə dövlət büdcəsinə qeyri-yaşayış və torpaq sahələrinin icarəsindən ümumilikdə 262 min manat vəsait ödənilib. Ötən üç ayda dövlət büdcəsinə daxilolmalar 2025-ci ilin eyni dövrü ilə müqayisədə 60,1 faiz artıb.