Belarus Respublikası İnşaatçılar İttifaqı ilə Azərbaycan Tikinti İstehsalçıları Assosiasiyası (ATİA) arasında Anlaşma Memorandumu imzalanıb.

Belarus mediasının verdiyi məlumata görə, tərəflərin Minskdə keçirilən görüşünün əsas nəticəsi olan bu sənəd memarlıq və tikinti sahəsində sistemli əməkdaşlığa keçidi təsbit edir və irimiqyaslı birgə layihələrin icrası üçün baza yaradır.

Cari tərəfdaşlıq çərçivəsində belaruslu mütəxəssislər artıq Azərbaycanın Ağdam rayonunda obyektlərin layihələndirilməsini həyata keçirirlər ki, burada yaxın vaxtlarda aqroşəhərciyin salınmasına başlanılacaq. Layihə bütün zəruri infrastrukturun və rahat yaşayış sahələrinin yaradılmasını nəzərdə tutur. Tərəflər, həmçinin, müasir tikinti materiallarının qarşılıqlı tədarükünü aktiv şəkildə inkişaf etdirmək və qabaqcıl mühəndis həllərini tətbiq etmək niyyətindədirlər.

Əməkdaşlığı yeni səviyyəyə qaldırmaq üçün Azərbaycan tərəfi sənaye, mənzil infrastrukturu, lift təsərrüfatı və peşəkar kadrların hazırlanması sahələrində məsələlərin operativ həlli üçün dövlət strukturlarını və biznesi birləşdirəcək daimi fəaliyyət göstərən koordinasiya mexanizminin yaradılmasını təklif edib. İcazə və lisenziyalaşdırma prosedurlarının sadələşdirilməsinə xüsusi diqqət yetirilməsi planlaşdırılır ki, bu da hər iki ölkənin şirkətlərinə ümumi bazarlarda daha səmərəli fəaliyyət göstərməyə imkan verəcək.