Azərbaycanın həm qardaş Türkiyə ilə, həm Gürcüstanla çox müsbət zəngin iqtisadi, ticarət, qarşılıqlı sərmayə sahəsində əlaqələri var və bizim iş adamlarımızın görüşü bu əlaqələrin genişləndirilməsi üçün gözəl fürsət yaradır. Bu sözləri jurnalistlərə açıqlaması zamanı Azərbaycan-Gürcüstan-Türkiyə biznes-forumunda iştirak edən Azərbaycanın iqtisadiyyat naziri Mikayıl Cabbarov deyib.

Onun sözlərinə görə, Azərbaycan həm Türkiyə, həm də Gürcüstan iqtisadiyyatına sərmayələr qoyub və ölkəmiz bu göstərici üzrə aparıcı sıradadır.

“Biz inanırıq ki, dövlətimizin başçısının həyata keçirdiyi siyasətə uyğun enerji, nəqliyyat dəhlizləri, qarşılıqlı sərmayə, turizm və bir sıra digər sahələrdə əldə edilmiş uğurlar növbəti mərhələdə yeni sahələrin əlavə edilməsi üçün çox gözəl imkan və fürsət yaradır. İnanırıq ki, Orta Dəhlizin səmərəliliyinin daha da artırılması, Azərbaycanın ayrılmaz hissəsi olan Naxçıvan üzərindən Zəngəzur dəhlizinin həyata keçirilməsi, Zəngəzur–Qars və Naxçıvan–Qars dəmir yolu layihələrinin reallaşdırılması müsbət rol oynayacaq, ümumilikdə Orta Dəhlizin, eləcə də Cənubi Qafqazın tranzit və regional ticarətdə rolunu daha da artıracaq. Çox məmnunuq ki, hər üç ölkədən xeyli sayda iş adamı, dövlət şirkətləri ilə yanaşı, özəl sektor nümayəndələri də forumda iştirak edir, məhsuldar müzakirələr aparılır. Eyni zamanda, həmkar nazirlərlə gündəlikdə duran məsələlərin müzakirəsi üçün də bu fürsətdən istifadə etdik”, - deyə Mikayıl Cabbarov əlavə edib.

AZƏRTAC