Azərbaycan və Birləşmiş Ərəb Əmirlikləri (BƏƏ) arasında biznes əlaqələrinin genişləndirilməsi üçün böyük potensial mövcuddur. Hər iki dövlətin biznes strukturları arasında qarşılıqlı faydalı əməkdaşlıq əlaqələri tərəflərə gəlir və etimad qazandıra bilər. Ölkələrimiz arasındakı münasibətlərin yüksələn xətlə inkişafı biznes üçün olduqca əlverişli imkanlar açır.

Bu sözləri İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev Bakıda keçirilən Azərbaycan-BƏƏ qida və kənd təsərrüfatı üzrə işgüzar dəyirmi masada çıxışı zamanı deyib.

Onun sözlərinə görə, hər iki ölkə arasında, xüsusilə qida sənayesi və kənd təsərrüfatı sahələrində əməkdaşlığın genişləndirilməsi üçün əlverişli imkanlar var.

“Bu imkanlardan istifadə edib ticarət və biznesi daha da genişləndirmək mümkündür. Bu dəyirmi masanın da məqsədi hər iki ölkənin iş adamları və biznes strukturları arasında əlaqələri artırmaqdan ibarətdir. Bugünkü dəyirmi masada geniş tərkibli nümayəndə heyətləri iştirak edirlər. Tədbirdə iştirak etmək üçün BƏƏ-dən bir sıra şirkətlər və 25 nəfərlik heyət, Azərbaycandan isə 16 şirkət və 20-dən çox iştirakçı gəlib”, - deyə AZPROMO-nun icraçı direktoru əlavə edib.

AZƏRTAC