İşğaldan azad edilmiş ərazilərdə kənd təsərrüfatı təyinatlı torpaqların sahibkarlıq subyektlərinə icarəyə verilməsi üzrə ikinci investisiya müsabiqəsi üzrə müraciətlərin (ərizələrin) qəbuluna başlanılıb.

Kənd Təsərrüfatı Nazirliyinin məlumatına görə, investisiya layihəsinin həyata keçiriləcəyi torpaq sahələri Xocavənd, Xocalı, Zəngilan, Qubadlı, Cəbrayıl, Ağdərə, Ağdam, Füzuli və Laçın rayonlarında yerləşir.

İnvestisiya layihəsinin istiqamətləri əkinçilik, bağçılıq, heyvandarlıq, gülçülük istixanası və balıqçılıq sahələrini əhatə edir.

İcarə müqaviləsi ilkin olaraq 5 il müddətinə imzalanır. Həmin müddətin sonunda Qaydalara uyğun olaraq həyata keçirilən nəzarət tədbirlərinə əsasən, müsabiqə qalibinin Qaydaların və icarə müqaviləsinin tələblərinə əməl etdiyi müəyyən edildikdə, icarə müqaviləsinin müddəti əlavə 44 ilədək uzadılır.

Müraciətlər Elektron Kənd Təsərrüfatı İnformasiya Sistemi (eagro.az) üzərindən 5 fevral tarixinədək qəbul ediləcək. Müsabiqə ilə bağlı ətraflı məlumatla https://shorturl.at/A00Jf səhifəsindən tanış olmaq olar.