Bu ilin yanvar-noyabr aylarında Naxçıvan Muxtar Respublikasında ümumi daxili məhsul istehsalı (ÜDM) 1 490,5 milyon manat olub.

Muxtar Respublikanın Dövlət Statistika Komitəsinin hesabatına əsasən, bu, 2024-cü ilin müvafiq dövrü ilə müqayisədə 3,6 faiz çoxdur.

Hesabat dövründə əhalinin hər nəfərinə düşən ÜDM istehsalı 3,2 faiz artaraq 3159,8 manat təşkil edib.

Bu dövrdə Naxçıvanda iqtisadiyyatın və sosial sahələrin inkişafı üçün bütün maliyyə mənbələrindən əsas kapitala 204 milyon manatdan çox vəsait yönəldilib ki, bu da bir il öncəki göstəricini 45,4 faiz üstələyir.

İstifadə olunan vəsaitin 72,963 milyon manatı və ya 35,8 faizi məhsul istehsalı sahələrinə, 48,857 milyon manatı və ya 23,9 faizi xidmət sahələrinə, 82,197 milyon manatı və ya 40,3 faizi isə yaşayış evlərinin tikintisinə sərf olunub.

Əsas kapitala vəsait qoyuluşunun 146,3 milyon manatı və ya 71,8 faizi tikinti-quraşdırma işlərinin payına düşüb ki, bu da 2024-cü ilin müvafiq dövrü ilə müqayisədə 26,2 faiz çoxdur.