Azərbaycan son illər ərzində genişmiqyaslı iqtisadi islahatlar həyata keçirərək, sahibkarlığın inkişafına xüsusi önəm verib. Bu təcrübəni ECO regionu ölkələri ilə bölüşmək, qarşılıqlı investisiya təşviqini gücləndirmək üçün konkret əməkdaşlıq mexanizmlərinə ehtiyac var.

Bu barədə Azərbaycan Sahibkarlar (İşəgötürənlər) Təşkilatları Milli Konfederasiyasının (ASK) prezidenti Məmməd Musayev Şuşada keçirilən 6-cı ECO biznes-forumunda çıxışı zamanı deyib.

Onun sözlərinə görə, hazırda Azərbaycanın ECO regionu ölkələri ilə xarici ticarət dövriyyəsinin həcmi 8 milyard dollardır ki, bu rəqəm cəmi ticarət dövriyyəsinin təxminən 17 faizi deməkdir.

“Bu forumun əsas mövzusu – investisiya və ticarətin təşviqi bizim üçün olduqca aktualdır. ECO regionunun davamlı inkişafı və iqtisadi inteqrasiyası istiqamətində bizneslərin oynadığı rolu yüksək qiymətləndiririk. Təşkilatımız hər zaman öz üzvləri ilə birlikdə ticarət və investisiya əlaqələrinin genişlənməsinə, xüsusilə yaşıl iqtisadiyyat, aqrar istehsal, rəqəmsal transformasiya və logistika kimi prioritet sahələrdə birgə təşəbbüslərin dəstəklənməsinə xüsusi önəm verir. Region daxilində ortaq müəssisələrin yaradılması, investisiya və biznes mühitinin əlverişliliyinin yüksəldilməsi üçün normativ bazaların bir-birinə uyğunlaşdırılması kimi mövzuların ön plana çəkilməsi bu forumun əsas töhfələrindən biri ola bilər. ECO ölkələrinin sahibkarlıq qurumları ilə əməkdaşlığa, təcrübə mübadiləsinə və davamlı dialoqa hər zaman açığıq və hazırda bir sıra ölkələrin biznesə dəstək təşkilatları ilə aktiv əməkdaşlıq edirik. Bu forumun nəticəsində də yeni niyyət protokolları, birgə platformalar və strateji təşəbbüslərin yaranacağına inanırıq”, - deyə M.Musayev diqqətə çatdırıb.

AZƏRTAC