Azərbaycan bazarında "Made in Turan" brendi ilə məhsulların satışına gələn ilin yanvarından start veriləcək. Bunu "Azərbaycan iqtisadiyyatı" Teleqram kanalına Azərbaycan Françayzinq Assosiasiyasının İdarə Heyətinin sədri Camid Mövsümov deyib.

Onun sözlərinə görə, artıq məhsullar Azərbaycan bazarı üçün standartlaşdırılıb və yaxın iki ayda müvafiq sertifikatlar əldə olunacaq.

"Artıq Türkiyə şirkəti tərəfindən "Made in Turan" brendi altında ilk məhsullar istehsal edilib. Söhbət ev və avtomobil təmizlik vasitələrindən gedir. Məhsulların özəlliyi ondan ibarətdir ki, onların tərkibində kimyəvi qatqılardan istifadə edilmir. "Made in Turan"la bağlı əsas hədəflərimizdən biri məhz sıfır kimyəvi qatqı ilə və iqlim normalarına əməl olunmaqla məhsul istehsal etməkdir",- C.Mövsümov qeyd edib.