Ələt Azad İqtisadi Zonasında yeni hava limanının tikintisi üzrə aparılan işlərin birinci fazasının 2026-cı ilin ikinci rübündə tamamlanması nəzərdə tutulur. Bu barədə “Azərbaycan iqtisadiyyatı” Teleqram kanalına “Silkway West Airlines” şirkəti prezidentinin ətraf mühit məsələləri üzrə müşaviri Kamran Babayev məlumat verib.

Onun sözlərinə görə, birinci faza çərçivəsində uçuş-enmə zolağı və əməliyyat binaları tikiləcək.

"İkinci faza çərçivəsində isə inzibati binalar inşa ediləcək. Bu faza üzrə işlərin 2029-cu ilin ikinci, yaxud üçüncü rübündə tamamlanacağı planlaşdırılır. Hava limanı eyni zamanda 21 təyyarəni qəbul etmək imkanına malik olacaq. Vətəndaşların hava limanındakı karqo terminalına gedib-qayıtmaları üçün dəmiryolu nəqliyyatından istifadə imkanının da yaradılması nəzərdə tutulur",- K.Babayev qeyd edib.

O əlavə edib ki, hava limanı sırf yaşıl konsepsiya əsasında fəaliyyət göstərəcək. Burada alternativ enerjidən istifadə olunacaq: “Hər bir binanın üzərində günəş panelləri quraşdırılacaq. Hava limanı ərazisində bütün yerüstü nəqliyyat vasitələri, avadanlıqlar elektrik enerjisi ilə idarə olunacaq. Ərazidə, həmçinin, çirkab sularının təmizlənməsi stansiyaları quraşdırılacaq. Biz əlimizdən gələni edirik ki, emissiyaların həcmini azaldaq. Biz həm inşaatdan əvvəl, həm təhvil-təslim fazasından sonra ətraf mühitə dəyə biləcək hər bir ziyanı qiymətləndirərək, ona uyğun nəzarət tədbirləri tətbiq edəcəyik. Yekunda hava limanının Beynəlxalq Hava Limanı Təşkilatı tərəfindən akkreditasiyadan keçirilməsi nəzərdə tutulur".

Hüseyn VƏLİYEV