Bu ilin yanvar-sentyabr ayları ərzində 42 hərrac keçirilib. Hərraclarda 5 səhmdar cəmiyyətinin səhm paketi, 6 kiçik dövlət müəssisəsi, 525 nəqliyyat vasitəsi satılıb.

İqtisadiyyat Nazirliyi yanında Əmlak Məsələləri Dövlət Xidmətinin məlumatına görə, hərraca çıxarılan dövlət əmlakı üzrə 391 elektron sifariş qəbul edilib, hərraclarda iştirak etmək məqsədilə “Elektron hərrac” proqram təminatı vasitəsilə 48 onlayn qoşulma reallaşıb.

Yeni iş yerlərinin açılması, sosial-iqtisadi inkişafın daha da sürətləndirilməsi baxımından iri dövlət müəssisələrinin investisiya müsabiqələri vasitəsi ilə özəlləşdirilməsi mühüm əhəmiyyət kəsb edir.

Hesabat dövründə investisiya müsabiqəsi vasitəsilə “Bakı Alüminium Profil” MMC, “Bakı Mərmər Qranit” MMC və “Gəncə Qənnadı” ASC özəlləşdirilib.

Cari ilin yanvar-sentyabr ayları üzrə özəlləşdirmədən dövlət büdcəsinə 108 milyon manat vəsait daxil olub, ötən ilin eyni dövrü ilə müqayisədə 13 faiz artım qeydə alınıb.