Tacikistan Azərbaycan şirkətlərinin neft yataqlarının işlənməsində və ölkənin neft emalı müəssisələri üçün neft tədarükündə iştirakında maraqlıdır.

Bu barədə Baku TV-yə Tacikistanın Azərbaycandakı səfiri İlhom Abdurahmon məlumat verib.

Səfir qeyd edib ki, iqtisadi əməkdaşlıq ölkələr arasında ikitərəfli əməkdaşlığın əsas istiqamətlərindən biridir. Əməkdaşlığın gələcək inkişafı üçün böyük potensiala malik bir sıra sahələr var.

İ.Abdurahmonun sözlərinə görə, perspektivli sahələrdən biri də kənd təsərrüfatıdır. Toxuculuq sənayesi, o cümlədən pambıqçılıq, xam pambıq və pambıq toxumlarının emalı, həmçinin pambıq yağının istehsalı və satışı sahəsində qarşılıqlı faydalı əməkdaşlığın qurulması üçün yaxşı imkanlar mövcuddur.

Digər perspektivli sahə nəqliyyat və rabitə sahəsidir. Səfir vurğulayıb ki, Bakı-Tbilisi-Qars dəmir yolu və Bakı Beynəlxalq Dəniz Ticarət Limanı Tacikistandan beynəlxalq bazarlara malların ixracı üçün yeni imkanlar yaradır.

O əlavə edib ki, Tacikistan Transxəzər Beynəlxalq Nəqliyyat Marşrutunun inkişafında iştiraka böyük əhəmiyyət verir və bu marşrutla avtomobil yükdaşımalarının həcminin artırılmasına sadiqdir.