“Azərbaycan və Özbəkistan arasında investisiya əməkdaşlığı sinergetik effekt verəcək”.

Bunu Azərbaycanın iqtisadiyyat naziri Mikayıl Cabbarov Daşkənddə təşkil olunan Özbəkistan-Azərbaycan biznes forumunda çıxışı zamanı deyib.

Ticarət və iqtisadi əməkdaşlıqdan danışan nazir “Uzavtosanoat” şirkəti və onun tərəfdaşlarının Azərbaycandakı birgə fəaliyyətini qeyd edib. Nazir bildirib ki, layihə uğurla davam edir və onun qeyd olunmuş müddət və parametrlər daxilində tam şəkildə həyata keçirilməsi üçün bütün səylər göstəriləcəkdir.

Mikayıl Cabbarov Azərbaycan-Özbəkistan əməkdaşlığının genişləndiyini və artıq neft, neft-kimya və digər sənaye sahələri üzrə layihələri əhatə etdiyini diqqətə çatdırıb.

Nazir Azərbaycan-Özbəkistan İnvestisiya Şirkətinin fəaliyyətini də qeyd edib. O vurğulayıb ki, müzakirə olunan layihələr portfeli şirkətin fəaliyyət sahələrinin çoxistiqamətli xarakterini göstərir. Hər iki ölkənin hökumətləri şirkətin vəsaiti ayrıldıqca onun maliyyə resurslarını genişləndirməyə hazırdır.