“Bakı Enerji Həftəsi çərçivəsində Azərbaycan Respublikası Dövlət Neft Şirkəti (SOCAR) ilə Birləşmiş Ərəb Əmirliklərinin “Masdar” şirkəti arasında üç bərpaolunan enerji layihəsi üzrə imzalanmış Səhmdarlar Sazişləri enerji layihələrini gücləndirəcək və iki ölkə arasında strateji tərəfdaşlığı genişləndirəcək”.

Bu barədə “Azərbaycan iqtisadiyyatı” Telegram kanalına Pakistanın Qlobal və Strateji Araşdırmalar Mərkəzinin (CGSS) icraçı direktoru Xalid Teymur Əkrəm məlumat verib.

Onun sözlərinə görə, Bakı Enerji Həftəsinin regionun enerji sektorunda rolu böyükdür, çünki bu tədbirlərdə həm də Xəzər regionunda neft-qaz layihələri və regionun enerji təhlükəsizliyinə diqqət yetirilir.

“Bakı Enerji Həftəsi enerji sektorunun aktual problemlərini müzakirə etmək və enerji sənayesində mühüm maraqlı tərəfləri bir araya gətirmək üçün platforma rolunu oynayır. Tədbir enerji təhlükəsizliyi, enerji istehsalı, nəqliyyat və digər mühüm qlobal problemləri müzakirə etmək üçün nümayəndələri və beynəlxalq təşkilatları bir araya gətirir. Azərbaycanın digər enerji şirkətləri ilə əməkdaşlığı həm yerli, həm də xarici şirkətlərə potensial əməkdaşlıq və gələcək tərəfdaşlıqlarla bağlı üzbəüz müzakirələr aparmağa imkan verir”, - ekspert bildirib.

Ekspert Azərbaycanın yaşıl gələcəyə sadiqliyini və əməkdaşlığın gücləndirilməsi, ətraf mühitin mühafizəsi və sosial rifaha real töhfə verdiyini vurğulayıb: “Azərbaycan xarici ticarətin asanlaşdırılması, biznes və investisiya mühitinin yaxşılaşdırılması üçün iqtisadi islahatların intensivləşdirilməsinin vacibliyini vurğulayır. Prezident İlham Əliyevin rəhbərliyi ilə yürüdülən siyasət biznes mühitinin yaxşılaşdırılması, investisiya qoyuluşu və davamlı inkişafa sadiqliyə əsaslanır. Bu öhdəlik qarşılıqlı artım, tərəqqi və zənginləşən mədəni mübadilə trayektoriyasında öz əksini tapır. Birləşmiş Ərəb Əmirlikləri və Azərbaycan arasındakı birgə tərəfdaşlıq tərəqqi və inkişafa dair ümumi baxışı, ahəngdar işləmək potensialını önə çıxarır”.

Tamilla MƏMMƏDOVA