Prezident İlham Əliyevin Sərəncamı ilə Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi, həmçinin BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) kimi mötəbər tədbirin keçirilməsi ölkəmiz üçün xüsusi olaraq əlamətdar hadisədir.

Bu barədə “Vergi sistemi yeni inkişaf dövründə: davamlı iqtisadiyyat üçün strateji hədəflər” Forumunda çıxış edərkən ekologiya və təbii sərvətlər nazirinin səlahiyyətlərini icra edən Muxtar Babayev deyib.

Onun sözlərinə görə, bu il beynəlxalq ictimaiyyətin bütün diqqəti ölkəmizə, xüsusilə də ətraf mühitin qorunması və iqlim dəyişmələrinin qarşısının alınması istiqamətində fəaliyyətlərə yönləndiriləcək.

“İqlim maliyyəsi COP29-un əsas mövzusudur. Emissiyaların azaldılması daha çox maliyyə vəsaiti tələb edir. Təmiz enerji və yaşıl texnologiyalara qlobal sərmayələr artırılmalıdır, iqlim dəyişikliyinin mənfi təsirini azaltmağa kömək edən yeni həllər və innovasiyalar təqdim edilməlidir. Hədəflərə çatmaq üçün bütün maraqlı tərəflərin aktiv iştirakı tələb olunur. Hökumət, özəl sektor və vətəndaş cəmiyyəti birlikdə çalışmalıdır”, - deyə M.Babayev qeyd edib.