Rusiya bu ilin sonunda Bakıda keçiriləcək növbəti Ümumdünya İqlim Sammitinə – COP29-a hazırlaşır.

"Azərbaycan iqtisadiyyatı" Teleqram kanalı Rusiya mətbuatına istinadən xəbər verir ki, bu barədə Rusiya Federasiyasının iqtisadi inkişaf naziri Maksim Reşetnikov Rusiya Biznes Həftəsi çərçivəsində keçirilən İqlim Forumunda çıxış edərkən deyib.

Onun sözlərinə görə, bunun üçün yol xəritəsi hazırlanır ki, bu da sadəcə şüarlar toplusu deyil, konkret təkliflər və tədbirlər olmalıdır.

“Qarşıdan gələn iqlim konfransında Rusiyanın əsas prioritetlərindən biri maliyyə gündəliyi olacaq. Hansı layihələrin “yaşıl” hesab ediləcəyi və onların hansı alətlərlə dəstəklənəcəyinə qərar verilməsi planlaşdırılır. Əsas odur ki, “ədalətli enerji keçidi” məntiqinə əməl edək. Emissiyaların ən böyük həcmi ənənəvi enerjidən gəlir. Enerji təhlükəsizliyini təmin etmək üçün qalıq yanacaq sektoruna investisiya cəlb etmək imkanı olmalıdır”, - M.Reşetnikov bildirib.