Azərbaycanda çəltik istehsalı ötən mövsümlə müqayisədə artıb. Bunu “Azərbaycan iqtisadiyyatı” Teleqram kanalına "Azərbaycan Çəltik İstehsalçıları və İxracatçıları Assosiasiyası" İctimai Birliyinin İdarə Heyətinin sədri Rövşən Əliyev bildirib.

Onun sözlərinə görə, 2023-cü ildə ölkədə 5000 hektara yaxın ərazidə çəltik əkilib. Bu isə ötən ildəkindən təqribən 300 hektar çoxdur: “Əkin sahələrinin subsidiyalaşdırılmasında yenilik oldu. Təkrar çəltik əkinlərinə görə dövlət tərəfindən hər hektar üçün 100 manat subsidiyanın verilməsi Mil-Muğan rayonlarında əkin sahələrinin çoxalmasına səbəb oldu”. Keçən mövsümə nisbətən əlavə 150 hektara yaxın sahədə, ümumilikdə isə 1045 hektar ərazidə təkrar çəltik əkini aparılıb”.

Yazda havanın soyuq və yağmurlu keçməsinin Lənkəran-Astara bölgəsində əkini bir qədər gecikdirdiyini deyən R.Əliyev əlavə edib ki, 2022-ci ildə 11 min ton, 2023-cü ildə isə 15 040 ton çəltik məhsulu yığılıb: “4000 ton artıq məhsul yığılıb, məhsuldarlıq hər hektar üçün 35,6 sentner təşkil edib. Su çatışmazlığı səbəbindən Masallı-Lənkəran bölgəsində 200 hektardan artıq sahə, ümumilikdə isə təxminən 270 hektar sahə biçilməmiş qalıb. Əgər bu ərazilərdən də məhsul yığılsaydı, 2023-cü ildə nəticə 18-20 min ton olardı”.

R.Əliyev qeyd edib ki, 2023-cü ildə Astara, Masallı, İmişli, Kürdəmir, Salyan, Ucar, Yevlax, Zərdab və s. daxil olmaqla, ümumilikdə 11 rayon çəltik əkini ilə məşğul olub.

İlhamə İSABALAYEVA