2023-cü ilin yanvar-noyabr aylarında Azərbaycanın İordaniya ilə ticarət dövriyyəsinin ümumi həcmi 2022-ci ilin müvafiq dövrünə nisbətdə 62,6 faiz və ya 2,89 milyon ABŞ dolları artaraq 7,53 milyon dolları üstələyib.

“Azərbaycan iqtisadiyyatı” Teleqram kanalının Dövlət Gömrük Komitəsinin hesabatı əsasında apardığı hesablamalara görə, ötən ilin ilk 11 ayında Azərbaycandan İordaniyaya 553,1 min dollar dəyərində məhsul ixrac edilib ki, bu da 2022-ci ilin eyni göstəricisindən təqribən 2,2 dəfə və ya 300 min dollar çoxdur.

İordaniyadan Azərbaycana idxal edilən məhsulların dəyəri isə 59,3 faiz və ya 2,59 milyon dollar artaraq 6,97 milyon dollar təşkil edib.

2023-cü ilin yanvar-noyabr aylarının nəticələrinə görə, ölkənin ümumi ticarət dövriyyəsində İordaniya ilə ticarətin payı 0,01 faiz təşkil edib.