Rusiya Federasiyasının Orenburq vilayətindən olan sahibkarların iştirakı ilə Azərbaycana biznes-missiya təşkil olunub.

"Azərbaycan iqtisadiyyatı" Teleqram kanalı Orenburq hökumətinin yaydığı məlumata istinadən xəbər verir ki, nümayəndə heyətinə neft və qaz hasilatı üçün avadanlıqların, bal və bal tərkibli məhsulların, həmçinin süd məhsullarının istehsalı sahəsində fəaliyyət göstərən üç şirkət daxildir.

Missiyanın nəticəsi olaraq “Azneftemaş” Orenburqun “Texnoprom” müəssisəsi tərəfindən bağlama klapanlarının tədarükünə maraq göstərib. Hazırda məhsulların texniki xüsusiyyətləri müzakirə olunur.

“A7 Agro” və “Musikhin World of Honey” müəssisələri isə Azərbaycanın iri pərakəndə satış şəbəkələrində süd və bal məhsullarını tədarük etmək niyyətindədirlər.

Qeyd olunur ki, son beş ildə Orenburq vilayəti ilə Azərbaycan arasında qarşılıqlı ticarətin həcmi 5,8 dəfə artıb. Əsas ixrac malları neft məhsulları və günəbaxan yağıdır. Azərbaycan bazarına buğda, elektrotexniki avadanlıqlar, qeyri-üzvi kimya məhsulları və plastik məmulatlar da ixrac olunur.