Bu ilin yanvar-oktyabr aylarında Azərbaycanın Türkiyə ilə ticarət dövriyyəsinin ümumi həcmi ötən ilin müvafiq dövrünə nisbətdə 1,68 milyard ABŞ dolları və ya 33,4 faiz artaraq 6,74 milyard dolları üstələyib.

“Azərbaycan iqtisadiyyatı” Teleqram kanalının Dövlət Gömrük Komitəsinin hesabatı əsasında apardığı hesablamalara görə, cari ilin ilk 10 ayında Azərbaycandan Türkiyəyə 4,83 milyard dollar dəyərində məhsul ixrac edilib ki, bu da 2022-ci ilin eyni göstəricisindən 50,1 faiz və ya 1,61 milyard dollar çoxdur.

Türkiyədən Azərbaycana idxal edilən məhsulların dəyəri isə 4 faiz və ya 74,2 milyon dollar artaraq 1,9 milyard dollar təşkil edib.

Cari ilin yanvar-oktyabr aylarının nəticələrinə görə, ölkənin ümumi ticarət dövriyyəsində Türkiyə ilə ticarətin payı 15,5 faiz təşkil edib ki, bu da bir il öncəki eyni göstəricini 4,58 faiz bəndi üstələyir.